Thuginpi

PCI HATTUOM THUGIN SAWMTE

THUMAPUI 
 

India gam Presbyterian Hattuom  (PCI) in bul-le-baal a a nei Hattuomte thugin zousie pomdet in; adieh in Wales gam Presbyterian thugin khu Pasian thu kizilsahna leh puonzahna hoitah hia pomdet in, Hattuom a ding leh Pasian thuzilna munte a ching a pomdet kawm in a nuoi a thuginte puonkhietna khu; a Pastorte, Sawltahte leh Upate’n a neidet ua a hinsuopi ding un apom hi.

THUGINPI-I 
 

Laisiengthou : Thuhun Lui leh Thuhun Tha khu Pasian thu lamdangngailou ginna leh nasep teena dihpeen khu ahi.

THUGINPI–II
 

Pasian khat bou a um a, ama bou khu bieh ding ahi. Ama khu Hagau ahi, Ama thu a hing um, hagau dangte toh kibanglou, lamdangtheilou, kumtawn a um, a hiina kikhellou, pilna, silbawltheina, sienthouna, dihtatna, hoina, thutah leh itna khu ahi.

THUGINPI–III
 

Pasian ah mihing thum a um a, Pa, Tapa, leh Hagau Siengthou ahi ua, tam mihing thumte khu Pasian khat, hiina kibang, silbawltheina leh loupina kibang ahi uhi.

THUGINPI–IV
 

Pasian Van, Lei leh a sung a sil um zousie siempa khu’n, mihing pasal leh numei, ama lim-le-meel suun in a na siem a, pilna, dihtatna leh sienthouna ah a na siem hi. Mi zousie kipatna bulpi kibang nei unau ahi uhi.

THUGINPI–V
 

Mihing ama diteel in Pasian daan thupieh a na botsie a, tuachi’n siemmawtanna leh sietna ah a na kiphumlut uhi. Tuachin mihingte siemmaw atanna, sietna leh khelna a kipat in hundam a, a um ua, kumtawn hinna anei theina ding un a  itna lamdangngailou jieh in a tapa tang neisun vannuoi ah a hing sawl hi. Ama ah bou mihingte’n hundamna a nga thei uhi. Tuachi’n a kumtawn Tapa khu mihing dihtatvawt leh Pasian hiina dihtahvawt nei in mihing a hing suoh a, bangchihtan in mihing khat ahi veve hi. Ama khu Hagau Siengthou silbawltheina jieh in ang kizil a nungah siengthou Mari in a hing a, hinanlezong khelna neilou ahi. Tawnkhielta mihingte jieh in Ama’n Pasian lungdamna ding inleh Pasian leh mihing kilemsah ding in Ama ngel khu kithoina dihtah leh nuolbei in a hing kipekhie hi. Singlaamte tung ah a shi a, vui in a um a, tuachi’n a ni thum ni’n shina kipat a thoukiata hi. Van ah katou in Pasian zietlam ah a tou a, a mipite a ding in thu a ngen zing hi. Tuachi’n mishite kaithou a leitung a thukhen ding in aang peikia ding hi.

THUGINPI–VI
 

Hagau Siengthou, Pa leh Tapa a hing kipan khu’n mihingte hundamna tang ding in a siem a, a tawnkhielnate leh a dinmun uh zau a huoi daan kitheichiensah hi. Khrist khu a Mangpa leh hundampa apom thei ngei ding in pui in A thunun a, tuachia dihtatna lam a ga nei ding in amau a lamkai hi.

THUGINPI–VII
 

Pasian in Khrist ah mihingte hutdamna bukim leh manbei khu a pie hi. A khelnate uh kisia a, Mangpa leh hundampa a pomkip ding in, kingiemkhietna hinkhuo leh siengthou, Pasian deilam hinkhuo ama a hing kilang bang a hinkho nei ding in a siem hi.

Koizong Khrist gingta a, a thu jui tapou khu hutdam ahia, khel ngaidamna, siemtansahna, Pasianta hiina, sunggil a Hagau Siengthou teenpina jieh in sienthouna leh kumtawn loupina a tangta hi. Gingtute ngel in hutdam kitheichetna a tang thei uhi. A lungsietna nasep ah khu’n Hagau Siengthou vanzah khu Thu leh thuhun, sakramentte leh Thugetna ahi.

THUGINPI–VIII
 

Sakramen Khrist in a siemte khu : Baptisma leh Mangpa nitah-ann ahi. Baptisma khu Pa, Tapa leh Hagau Siengthou min a tui a kisilna ahia, khum khu Khrist toh kipumkhatna, Hagau Siengthou a hin kilamdanna leh kisiemthana leh Mangpa a i kipiehkhietna etsahna ahi. Tam khu i khelna kisia a, Khrist a ginna jieh a hundampa a pomte leh a tate bou tansah ding ahi.

THUGINPI–IX
 

Hattuom kipawlkhawmna a pumkhat a um khawm khu gingtute nasep ahia, Sakramen leh Khrist ziatan daan dangte, daan dangte, daan thupieh zui siem, thumna nei zing, Mangpa ni nid siengthou, biehna nei ding a kimutuokhawm, thugen ngaikhietna, Pasian in a guoljawl dungzui a silpiehte pie a, Khrist toh kibahna hagaulam hinkhuo amau ua muthei a um a, mite tung a zong nei a, vannuoi buppi a Khrist leenggam khanletna ding a nasep leh loupitah a ama hing kilah hun ngah zing a um khu gingtute nasep ahi.

THUGINPI–X
 

Ni tawpni chieng in mishite kaithaw in umva un, a hinkhuo uh hoi leh hoiloute tung ah a nasep uh dungjui in a tung uah thukhenna umtava. Gingloute leh migiloute khu siemmaw tansah a um in a khelnate uh jieh in gawt in umtava uh. Hinanlezong Khrist gingta a, a thupieh sang mite khu dopkaang a um in loupina ah loplut in umtava uh.