Manipur Eastern Presbytery

MGP HING PIENKHIET DAN

Kum 1957 in Behieng (J) Khawmpi ah JCA a kiminlawna pen henkhiet a Manipur Christian Church (MCC) a kiminvaw dingin a thukim uhi. Tami kum khawmpi Session pen MGP kum sut patna ahing hita a, Session khatna a sim in tuni tan i Session Khawmpi kum simna ana hitouta hi. Khawmpi Chairman/Moderator Pastor Vungdal ana hia, Secretary khu Pu Hanggin ana hi hi. Tami khawmpi ah Pastor Mangdal zong ei lah a Pastor nna hing sem ding a pomlut ahia, sepsah ahi ngal hi.

A kumkia 1958 in Milongmun khuo ah khawmpi nei kia ahia, MCC chia min kiphuoh pen hen a Presbyterian Church zop ding thu ana lel uhi. Tuachiin Tuami kum 1958 sung mama in Tuolphei khuo ah Zou, Vaiphei leh Kuki ham zang teng in khawmpi kinei kia in, tuanah Manipur Gam Presbytery (MGP) chia min heng kia ahita hi. Tami hun lai in Presbyterian Hattuom toh kizopna tah a kinei naisih a, hinanleh NEIG Mission sung a zat tuomtuomte a Presbytery-Presbytery a kikhen ahimanin, Zou, Vaiphei leh Kuki ham zangte a ding a thuteng (Word) lemtang pen ‘GAM’ chi kitang in Manipur Gam Presbytery (MGP) ana kiphuo hi. Tami kum khawmpi ah Pastor Khamzalien zong ei lah a Pastor nna sem ding in pomlut ahi kia hi.

Presbyterian Hattuom zop ding tupna leh ngetna ana umsa bang in India Malsuo gam a Presbyterian Hattuom-Assembly of the Presbyterian Church in North East India (APCNEI) in October 11, 1959 in Rev. Zairema, Moderator hing sawl in, MGP leh Thuthaphai Presbytery (TTP) khu Lamka Presbyterian Biehinn ah loplutna a hing neita hi. Tami ni a kipat Presbyterian Hattuom i na hita uh china ahi. 

Presbytery 2 maimai ki-um pan a Synod nei thei kihinailou ahiman in Assembly in a enkoltu ding in Assembly Officer (AO) a hing sawl a, amaute leh a sep hun sung uh tam bang ahi.
1. Rev. G.R. Sancley(1959-1961)
2. Rev. Tongkhosat Thanggew(1962-1968)
3. Rev. Lalruma (1968-1975)
4. Rev. L. Glancey Lyndoh (1975-1978)

Tuachiin May 14, 1978 ni in Assembly Moderator Rev. H.M. Rapthap in Manipur Synod honna Lamka Presbyterian Biehinn ah aneita hi.

Presbytery siem be diing tupna sawtpi nei ahizounua in MGP apat Presbytery tha 2 siem ahita hi. Gungal, Gunpang leh Tuiningkuol lamteng Manipur Eastern Presbytery chi ahia, unau Vaiphei ham zangte a diing in Khuga & Sadar Presbytery akichi hi. Tam Presbytery ni (MEP leh KSP) Assembly Moderator Rev. Lalsawma in pomlutna Lamka Presbyterian Biehinn ah January 30, 1969 in neita hi. KSP a hing pien khiet toh kiton in unau Kuki ham zang MGP a umte pen unau Vaiphei ham zangte toh KSP ah a um khawmta ua, kum 10 zou nua April 22, 1979 in Presbytery tuom Molhangphai Presbytery (MLP) Manipur Synod in pomlutta hi.

Tampen Manipur Synod kineizou nua ahiman in Assembly ahinawnlou in Manipur Synod in MLP pomlutna bawltheita china ahi.